কৈশোৰ প্ৰাপ্তি
অনুশীলনী
১। অন্তঃস্ৰাৱী গ্ৰন্থিয়ে দেহৰ পৰিৱৰ্তনৰ বাবে নিঃসৰণ কৰা পদাৰ্থসমূহক কি নামেৰে নামকৰণ কৰা হৈছে?
উত্তৰঃ অন্তঃস্ৰাৱী গ্ৰন্থিয়ে দেহৰ বিভিন্ন পৰিৱৰ্তন নিয়ন্ত্ৰণ কৰিবলৈ নিঃসৰণ কৰা পদাৰ্থসমূহক হৰম’ন বোলে।
২। কৈশোৰ কাল কাক বোলে?
উত্তৰঃ জীৱনৰ যিটো সময়ছোৱাত শৰীৰৰ বৃদ্ধি আৰু বিভিন্ন শাৰীৰিক পৰিৱৰ্তন ঘটি এজন ব্যক্তিয়ে প্ৰজনন ক্ষমতা লাভ কৰে, সেই সময়ছোৱাক কৈশোৰ কাল বোলে। সাধাৰণতে কৈশোৰ কাল ১১ বছৰ বয়সৰ পৰা আৰম্ভ হৈ ১৮ বা ১৯ বছৰ বয়সলৈকে চলে।
৩। মাহেকীয়া ঋতুচক্ৰ কি? ব্যাখ্যা কৰা।
উত্তৰঃ ছোৱালীৰ যৌৱন প্ৰাপ্তিৰ পাছত ডিম্বাশয়ৰ পৰা সাধাৰণতে প্ৰতি ২৮ৰ পৰা ৩০ দিনৰ অন্তৰত একোটা পূৰঠ ডিম্বাণু নিঃসৰিত হয়। এই সময়ত সম্ভাব্য গৰ্ভধাৰণৰ বাবে জৰায়ুৰ আভ্যন্তৰীণ আৱৰণ ডাঠ হৈ পৰে।
যদি ডিম্বাণুটো নিষিক্ত নহয়, তেন্তে ডিম্বাণুৰ সৈতে জৰায়ুৰ ডাঠ আৱৰণৰ কিছু অংশ আৰু তেজ শৰীৰৰ বাহিৰলৈ ওলাই আহে। এই চক্ৰীয় প্ৰক্ৰিয়াক মাহেকীয়া ঋতুচক্ৰ বা ঋতুস্ৰাৱ বোলে।
৪। যৌৱন প্ৰাপ্তিৰ সময়ত হোৱা দেহৰ পৰিৱৰ্তনসমূহৰ তালিকা কৰা।
উত্তৰঃ যৌৱন প্ৰাপ্তিৰ সময়ত হোৱা মুখ্য পৰিৱৰ্তনসমূহ হ’ল—
১। শৰীৰৰ উচ্চতা দ্ৰুতভাৱে বৃদ্ধি পায়।
২। দেহৰ আকৃতিৰ পৰিৱৰ্তন ঘটে।
৩। প্ৰজনন অংগসমূহৰ বিকাশ আৰু পৰিপক্বতা ঘটে।
৪। ল’ৰাৰ মাত গম্ভীৰ বা কৰ্কশ হয়।
৫। ল’ৰাৰ মুখমণ্ডলত দাঢ়ি-গোঁফ গজে।
৬। ছোৱালীৰ স্তনৰ বিকাশ ঘটে।
৭। ল’ৰা-ছোৱালী উভয়ৰে বাহুৰ তলত আৰু গুপ্তাংগৰ চাৰিওফালে নোম গজে।
৮। ঘৰ্মগ্ৰন্থি আৰু তৈলগ্ৰন্থিৰ কাৰ্য বৃদ্ধি পায়।
৯। মানসিক, আৱেগিক আৰু বৌদ্ধিক বিকাশ ঘটে।
১০। ল’ৰা-ছোৱালীয়ে প্ৰজনন ক্ষমতা লাভ কৰে।
৫। অন্তঃস্ৰাৱী গ্ৰন্থিসমূহ আৰু নিঃসৰণ কৰা হৰম’নৰ নামৰ এখন তালিকা দুটা স্তম্ভত প্ৰস্তুত কৰা।
উত্তৰঃ
| অন্তঃস্ৰাৱী গ্ৰন্থি | নিঃসৰণ কৰা হৰম’ন |
|---|---|
| অণ্ডকোষ | টেষ্ট’ষ্টেৰন |
| ডিম্বাশয় | ইষ্ট্ৰ’জেন |
| পিটুইটাৰী গ্ৰন্থি | বৃদ্ধি হৰম’ন |
| থাইৰয়ড গ্ৰন্থি | থাইৰ’ক্সিন |
| এড্ৰিনেল গ্ৰন্থি | এড্ৰিনেলিন |
| অগ্ন্যাশয় | ইনছুলিন |
৬। যৌন হৰম’ন কি? সেইবোৰক কিয় এনে নাম দিয়া হ’ল? সেই হৰম’নবোৰৰ কাৰ্যৰ বৰ্ণনা দিয়া।
উত্তৰঃ অণ্ডকোষ আৰু ডিম্বাশয়ৰ পৰা নিঃসৰিত আৰু প্ৰজনন অংগ তথা গৌণ লিংগ চৰিত্ৰৰ বিকাশত সহায় কৰা হৰম’নসমূহক যৌন হৰম’ন বোলে।
ল’ৰাৰ অণ্ডকোষৰ পৰা টেষ্ট’ষ্টেৰন আৰু ছোৱালীৰ ডিম্বাশয়ৰ পৰা ইষ্ট্ৰ’জেন নিঃসৰিত হয়। এই হৰম’নসমূহে যৌৱন প্ৰাপ্তিৰ সময়ত ল’ৰা আৰু ছোৱালীৰ প্ৰজনন অংগ আৰু গৌণ লিংগ চৰিত্ৰৰ বিকাশ ঘটায় বাবে ইহঁতক যৌন হৰম’ন বোলা হয়।
টেষ্ট’ষ্টেৰনৰ কাৰ্যঃ
ল’ৰাৰ মুখমণ্ডলত দাঢ়ি-গোঁফ গজা, মাত গম্ভীৰ হোৱা, কান্ধ বহল হোৱা আৰু শৰীৰৰ কিছুমান অংশত নোম গজাৰ দৰে পৰিৱৰ্তনত সহায় কৰে।
ইষ্ট্ৰ’জেনৰ কাৰ্যঃ
ছোৱালীৰ স্তনৰ বিকাশ, দেহৰ আকৃতিৰ পৰিৱৰ্তন আৰু স্তনগ্ৰন্থিৰ বিকাশ আদি নিয়ন্ত্ৰণ কৰে।
৭। উপযুক্ত উক্তিটো বাছি উলিওৱা।
(ক) কিশোৰ-কিশোৰীসকল আহাৰ সম্পৰ্কে সচেতন হোৱা উচিত, কিয়নো—
(i) উপযুক্ত খাদ্যই কেৱল মগজুৰ বিকাশত সহায় কৰে।
(ii) শৰীৰত হৈ থকা দ্ৰুত বৃদ্ধিৰ বাবে উপযুক্ত আহাৰৰ প্ৰয়োজন।
(iii) কিশোৰ-কিশোৰীসকলৰ সদায় ভোক বেছি।
(iv) কিশোৰ-কিশোৰীসকলৰ স্বাদমুকুল অধিক সক্ৰিয়।
উত্তৰঃ (ii) শৰীৰত হৈ থকা দ্ৰুত বৃদ্ধিৰ বাবে উপযুক্ত আহাৰৰ প্ৰয়োজন।
(খ) মহিলাৰ প্ৰজনন বয়স আৰম্ভ হয় তেতিয়া—
(i) যেতিয়া মাহেকীয়া ঋতুচক্ৰ আৰম্ভ হয়।
(ii) যেতিয়া স্তনৰ বিকাশ হয়।
(iii) যেতিয়া দেহৰ ওজন বাঢ়ে।
(iv) যেতিয়া উচ্চতা বৃদ্ধি পায়।
উত্তৰঃ (i) যেতিয়া মাহেকীয়া ঋতুচক্ৰ আৰম্ভ হয়।
(গ) কিশোৰ-কিশোৰীৰ যথোপযুক্ত আহাৰ হ’ল—
(i) চিপছ, চাওমিন, কেক।
(ii) ৰুটি, দাইল, শাক-পাচলি।
(iii) ভাত, চাওমিন, বাৰ্গাৰ।
(iv) শাক-পাচলি যুক্ত কাটলেট, চিপছ আৰু নেমুৰ ৰস।
উত্তৰঃ (ii) ৰুটি, দাইল, শাক-পাচলি।
৮। চমু টোকা লিখা।
(ক) ডিঙিৰ ঘটিকা
উত্তৰঃ যৌৱন প্ৰাপ্তিৰ সময়ত ল’ৰাৰ স্বৰযন্ত্ৰৰ আকাৰ যথেষ্ট বৃদ্ধি পায়। এই বৰ্ধিত স্বৰযন্ত্ৰ ডিঙিৰ আগফালে এটা বাহিৰলৈ ওলাই থকা অংশৰ দৰে দেখা যায়। এই অংশটোক ডিঙিৰ ঘটিকা বা Adam’s apple বোলে। ছোৱালীৰ স্বৰযন্ত্ৰ তুলনামূলকভাৱে সৰু হোৱা বাবে ডিঙিৰ ঘটিকা সাধাৰণতে স্পষ্টকৈ দেখা নাযায়।
(খ) গৌণ লিংগ চৰিত্ৰ
উত্তৰঃ যৌৱন প্ৰাপ্তিৰ সময়ত ল’ৰা আৰু ছোৱালীৰ শৰীৰত কিছুমান বিশেষ বাহ্যিক বৈশিষ্ট্যৰ বিকাশ ঘটে, যিবোৰে পুৰুষ আৰু স্ত্ৰীৰ মাজত পাৰ্থক্য চিনাক্ত কৰাত সহায় কৰে। এই বৈশিষ্ট্যসমূহক গৌণ লিংগ চৰিত্ৰ বোলে।
ল’ৰাৰ মুখমণ্ডলত দাঢ়ি-গোঁফ গজা, মাত গম্ভীৰ হোৱা আৰু বুকুত নোম গজা আদি ল’ৰাৰ গৌণ লিংগ চৰিত্ৰ। ছোৱালীৰ স্তনৰ বিকাশ আদি ছোৱালীৰ গৌণ লিংগ চৰিত্ৰ। ল’ৰা আৰু ছোৱালী উভয়ৰে বাহুৰ তলত আৰু গুপ্তাংগৰ চাৰিওফালে নোম গজে।
(গ) শিশুৰ লিংগ নিৰ্ণয়
উত্তৰঃ মানুহৰ দেহকোষত ২৩ যোৰ ক্ৰম’জ’ম থাকে। ইয়াৰে এযোৰ হৈছে যৌন ক্ৰম’জ’ম। মহিলাৰ যৌন ক্ৰম’জ’ম XX, আনহাতে পুৰুষৰ যৌন ক্ৰম’জ’ম XY।
মহিলাৰ প্ৰতিটো ডিম্বাণুত X ক্ৰম’জ’ম থাকে। পুৰুষৰ শুক্ৰাণুৰ কিছুমানত X আৰু কিছুমানত Y ক্ৰম’জ’ম থাকে।
যদি X ক্ৰম’জ’মযুক্ত শুক্ৰাণুৱে ডিম্বাণুক নিষিক্ত কৰে, তেন্তে যোজনকোষৰ ক্ৰম’জ’ম XX হয় আৰু কন্যা সন্তানৰ বিকাশ ঘটে। আনহাতে, যদি Y ক্ৰম’জ’মযুক্ত শুক্ৰাণুৱে ডিম্বাণুক নিষিক্ত কৰে, তেন্তে যোজনকোষৰ ক্ৰম’জ’ম XY হয় আৰু ল’ৰা সন্তানৰ বিকাশ ঘটে।
সেয়েহে শিশুৰ জৈৱিক লিংগ নিৰ্ধাৰণত পিতৃৰ শুক্ৰাণুৰ X বা Y ক্ৰম’জ’মে ভূমিকা পালন কৰে।
এই Post টো Update কৰাত সহায় কৰিব বিচাৰে নেকি?
ইয়াত কিবা ভুল, অসম্পূৰ্ণ তথ্য বা নতুন তথ্য থাকিলে আপুনি এটা উন্নত version প্ৰস্তুত কৰিব পাৰে। Live Post তৎক্ষণাৎ সলনি নহ'ব।
Update This Post