অৰূপৰ আৱেদন
পাঠভিত্তিক ক্রিয়াকলাপ
১। উত্তৰ দিয়া:
(ক) অৰূপে কি কাৰণত কেইবাদিনো স্কুলত অনুপস্থিত আছিল?
উত্তৰঃ অৰূপে গাঁৱৰ এঘৰলৈ ভোজ খাবলৈ গৈছিল। তাৰ পিছত তাৰ পেট-চলা অসুখ হোৱাত সি দুৰ্বল হৈ পৰিছিল। সেইবাবে সি কেইবাদিনো স্কুলত অনুপস্থিত আছিল।
(খ) অৰূপৰ পেট-চলা ৰোগ কিয় হৈছিল?
উত্তৰঃ গাঁৱৰ এঘৰলৈ ভোজ খাবলৈ গৈ অস্বাস্থ্যকৰ বা বেছি খাদ্য খোৱাৰ ফলত অৰূপৰ পেট-চলা ৰোগ হৈছিল।
(গ) অৰূপে দিয়া চিঠিখন পঢ়ি শিক্ষয়িত্ৰীগৰাকীয়ে কি কৈছিল?
উত্তৰঃ অৰূপে লিখিতভাৱে জনোৱাৰ বাবে শিক্ষয়িত্ৰীগৰাকীয়ে ভাল পাইছিল। কিন্তু তেওঁ কৈছিল যে অৰূপে লিখা পত্ৰখন তেওঁলৈ দিয়া এখন সাধাৰণ চিঠিহে। স্কুলত অনুপস্থিত থাকিলে বা থাকিবলগীয়া হ’লে ছুটী মঞ্জুৰীৰ বাবে আৱেদন লিখিব লাগে। আৱেদনক দৰ্খাস্ত বুলিও কোৱা হয়।
(ঘ) আৱেদনক আৰু কি বুলি কোৱা হয়?
উত্তৰঃ আৱেদনক দৰ্খাস্ত বুলিও কোৱা হয়।
(ঙ) অৰূপে পঢ়া স্কুলখনৰ নাম কি?
উত্তৰঃ অৰূপে পঢ়া স্কুলখনৰ নাম নৱজ্যোতি আদৰ্শ প্ৰাথমিক বিদ্যালয়।
(চ) অৰূপে কি বিচাৰি আৱেদন কৰিছিল?
উত্তৰঃ অৰূপে ছুটী মঞ্জুৰী বিচাৰি আৱেদন কৰিছিল।
২। শব্দবোৰৰ অৰ্থ লিখোঁ আহা:
ব্যস্ত, খতি, পেট-চলা, ছুটী, মঞ্জুৰ, একান্ত, শৈলী, শিৰোনামা
উত্তৰঃ
ব্যস্ত — কোনো কামত লাগি থকা।
খতি — কাম বন্ধ থকা বা অনুপস্থিত থকা।
পেট-চলা — বাৰে বাৰে শৌচ হোৱা পেটৰ অসুখ।
ছুটী — কাম বা বিদ্যালয়ৰ পৰা সাময়িক অব্যাহতি।
মঞ্জুৰ — অনুমোদিত বা স্বীকৃত।
একান্ত — একাগ্ৰ; অতি বিনীত বা আন্তৰিক।
শৈলী — ৰীতি, পদ্ধতি বা ভংগী।
শিৰোনামা — কোনো লেখা বা পত্ৰৰ ওপৰত দিয়া নাম বা শীৰ্ষক।
৩। “অৰূপ, তুমি দেখোন কেইবাদিনো স্কুল খতি কৰিলা, কিবা অসুখ-বিসুখ হৈছিল নেকি?” — এই প্ৰশ্নটো কোনে, কেতিয়া, কাক কৰিছিল?
উত্তৰঃ কেইবাদিনো স্কুলত অনুপস্থিত থকাৰ পিছত অৰূপ যেতিয়া পুনৰ স্কুললৈ আহিছিল, তেতিয়া ৰেহেনা খাতুন বাইদেৱে অৰূপক এই প্ৰশ্নটো কৰিছিল।
৪। স্কুলত অনুপস্থিত থাকিলে কাৰ জৰিয়তে কালৈ আৱেদন কৰিব লাগে?
উত্তৰঃ স্কুলত অনুপস্থিত থাকিলে শ্ৰেণী শিক্ষকৰ জৰিয়তে প্ৰধান শিক্ষকলৈ আৱেদন কৰিব লাগে।
৫। অৰূপে লিখা পত্ৰ আৰু শিক্ষয়িত্ৰী বাইদেৱে শিকোৱা আৱেদনখনৰ মাজত কি কি পাৰ্থক্য দেখিলা? কোৱা আৰু লিখা।
উত্তৰঃ অৰূপে লিখা পত্ৰখন এখন সাধাৰণ চিঠি আছিল, কিন্তু শিক্ষয়িত্ৰী বাইদেৱে শিকোৱা পত্ৰখন আছিল নিয়মমাফিক আৱেদন বা দৰ্খাস্ত। অৰূপৰ চিঠিখনত বিদ্যালয়ৰ নাম, প্ৰাপক, বিষয় আদি সঠিকভাৱে উল্লেখ কৰা নাছিল। আনহাতে আৱেদনখনত বিদ্যালয়ৰ নাম, প্ৰাপকৰ পদবী, বিষয়, মূল বক্তব্য, তাৰিখ আৰু আবেদনকাৰীৰ নাম আদি সুশৃংখলভাৱে লিখা হয়। সেয়েহে চিঠি আৰু আৱেদনৰ লিখনশৈলী বেলেগ।
৬। পাঠটিত থকা অতীত কাল বুজোৱা ক্রিয়াপদবোৰ বিচাৰি উলিয়াই লিখা।
উত্তৰঃ পাঠটিত থকা অতীত কাল বুজোৱা ক্রিয়াপদবোৰ হৈছে— কৰিলোঁ, হৈছিল, গৈছিলোঁ, খুৱাইছিল, নাছিলোঁ, নোৱাৰিলোঁ, জনালোঁ।
৭। তলৰ বাক্যবোৰৰ কাষত দুটাকৈ পদ দিয়া আছে। তাৰে এটাহে বাক্যটোৰ লগত খাপ খায়। খাপ খোৱা পদটোৰে বাক্যটো পুনৰ লিখা।
(ক) মই কাইলৈ গুৱাহাটীলৈ যাম / গৈছিলোঁ।
উত্তৰঃ মই কাইলৈ গুৱাহাটীলৈ যাম।
(খ) সৌৱা, চৰাইবোৰ আকাশত উৰিছে / উৰিছিল।
উত্তৰঃ সৌৱা, চৰাইবোৰ আকাশত উৰিছে।
(গ) যোৱাবেলি আমাৰ ইয়াত বানপানী হ’ব / হৈছিল।
উত্তৰঃ যোৱাবেলি আমাৰ ইয়াত বানপানী হৈছিল।
(ঘ) আহা, আমি ঘৰলৈ যাওঁ / গৈছিলোঁ।
উত্তৰঃ আহা, আমি ঘৰলৈ যাওঁ।
(ঙ) মই কিতাপ পঢ়োঁ / পঢ়ে।
উত্তৰঃ মই কিতাপ পঢ়োঁ।
(চ) তুমি কি কৰিছে / কৰিছা?
উত্তৰঃ তুমি কি কৰিছা?
(ছ) তেওঁ ধান দাইছা / দাইছে।
উত্তৰঃ তেওঁ ধান দাইছে।
(জ) আমি ছবি আঁকিছিলোঁ / আঁকিছিল।
উত্তৰঃ আমি ছবি আঁকিছিলোঁ।
(ঝ) তোমালোকে গীত গাইছিল / গাইছিলা।
উত্তৰঃ তোমালোকে গীত গাইছিলা।
(ঞ) তেওঁলোকে বল খেলিছিল / খেলিছিলা।
উত্তৰঃ তেওঁলোকে বল খেলিছিল।
(ট) দেউতা আজি আহি পাম / পাব।
উত্তৰঃ দেউতা আজি আহি পাব।
(ঠ) সিহঁতে কাইলৈ চিনেমা চাব / চাম।
উত্তৰঃ সিহঁতে কাইলৈ চিনেমা চাব।
(ড) আমি বৰশী বাম / বাব।
উত্তৰঃ আমি বৰশী বাম।
৮। সিপিঠিৰ ক্ৰিয়া-কলাপটোত লিখা শুদ্ধ বাক্যবোৰ কাল অনুসৰি ভাগে ভাগে লিখা।
উত্তৰঃ
| অতীত কাল | বৰ্তমান কাল | ভৱিষ্যত কাল |
|---|---|---|
| যোৱাবেলি আমাৰ ইয়াত বানপানী হৈছিল। | সৌৱা, চৰাইবোৰ আকাশত উৰিছে। | মই কাইলৈ গুৱাহাটীলৈ যাম। |
| আমি ছবি আঁকিছিলোঁ। | মই কিতাপ পঢ়োঁ। | দেউতা আজি আহি পাব। |
| তোমালোকে গীত গাইছিলা। | তুমি কি কৰিছা? | সিহঁতে কাইলৈ চিনেমা চাব। |
| তেওঁলোকে বল খেলিছিল। | তেওঁ ধান দাইছে। | আমি বৰশী বাম। |
৯। তলৰ খালী ঠাইবোৰ ক্ৰিয়াপদেৰে পূৰোৱা।
(ক) যোৱাবেলি আমি বনভোজ খাবলৈ গৈছিলোঁ। আমাৰ লগত ছাৰ-বাইদেউ সকলো গৈছিল। বাটত তেখেতসকলে আমাক বৰ ভাল কথা কৈছিল। মাজে মাজে আমি গান গাইছিলোঁ, ফূৰ্তি কৰিছিলোঁ আৰু কৌতুক শুনি হাঁহিছিলোঁ।
(খ) পছোৱা বতাহ বলিছে। সৌৱা পথাৰত এজাক গৰখীয়া ল’ৰাই খেলি আছে। তেওঁলোকৰ কেইজনমানে হাউগুদু খেলিছে। আন কেইজনমানে চিলা উৰাইছে। এজনে আকৌ গছৰ তলত বহি বাঁহী বজাইছে। আন এজনে আঁহতৰ পাতেৰে টুপী সাজিছে।
(গ) মা কাইলৈ মামাহঁতৰ ঘৰলৈ যাব। তাত তেওঁ কেইদিনমান থাকিব। মাহীদেউৰ বিয়াৰ পাছতহে উভতি আহিব। আহোঁতে মোলৈ লাৰু-পিঠা আনিব।
১০। শব্দ সাজি বাক্য ৰচনা কৰা।
অ + ৰূপ = অৰূপ
উত্তৰঃ অৰূপ কেইবাদিনো অসুস্থ হৈ স্কুলত অনুপস্থিত আছিল।
অ + সহ্য = অসহ্য
উত্তৰঃ আজিৰ গৰমটো বৰ অসহ্য।
অ + খাদ্য = অখাদ্য
উত্তৰঃ অখাদ্য বস্তু খাব নালাগে।
অ + সুখ = অসুখ
উত্তৰঃ অৰূপৰ পেটৰ অসুখ হৈছিল।
অ + মিল = অমিল
উত্তৰঃ দুয়োটা মতৰ মাজত অমিল আছে।
অনু + গ্ৰহ = অনুগ্ৰহ
উত্তৰঃ অনুগ্ৰহ কৰি মোৰ ছুটী মঞ্জুৰ কৰে যেন।
অনু + উপস্থিত = অনুপস্থিত
উত্তৰঃ ৰাজ কালি স্কুলত অনুপস্থিত আছিল।
অনু + ৰূপ = অনুৰূপ
উত্তৰঃ এই ছবিখন মূল ছবিখনৰ অনুৰূপ।
অনু + মান = অনুমান
উত্তৰঃ মই ঘটনাটোৰ কাৰণ অনুমান কৰিব পৰা নাই।
অনু + উচিত = অনুচিত
উত্তৰঃ অসুস্থ অৱস্থাত বাহিৰত ঘূৰি ফুৰাটো অনুচিত।
১১। সমূহীয়া ভোজ-ভাত খালে তলত দিয়া কোনবোৰ কাৰণত আমাৰ পেটৰ অসুখ হ’ব পাৰে?
উত্তৰঃ সমূহীয়া ভোজ-ভাত খালে তলৰ কাৰণবোৰত পেটৰ অসুখ হ’ব পাৰে—
- সোৱাদ পাই বেছিকৈ খালে।
- আঞ্জাত বেছি জ্বলা-মছলা থাকিলে।
- অসময়ত খালে।
১২। দলত আলোচনা কৰি লিখা।
(ক) বিশুদ্ধ খোৱা পানীৰ ব্যৱস্থা কৰিবলৈ অনুৰোধ জনাই প্ৰধান শিক্ষক মহোদয়লৈ আৱেদন পত্ৰ লিখা।
উত্তৰঃ
প্ৰতি,
মাননীয় প্ৰধান শিক্ষক মহোদয়,
ক খ গ বিদ্যালয়।
বিষয়ঃ বিদ্যালয়ত বিশুদ্ধ খোৱা পানীৰ ব্যৱস্থা কৰাৰ বাবে আৱেদন।
মহাশয়,
বিনীত নিৱেদন এই যে, আমাৰ বিদ্যালয়ত বিশুদ্ধ খোৱা পানীৰ যথেষ্ট সুবিধা নাই। ফলত ছাত্ৰ-ছাত্ৰীসকলে বহু অসুবিধাৰ সন্মুখীন হ’বলগীয়া হয়। সেয়েহে আমাৰ স্বাস্থ্যৰ কথা বিবেচনা কৰি বিদ্যালয়ত বিশুদ্ধ খোৱা পানীৰ উপযুক্ত ব্যৱস্থা কৰিবলৈ আপোনাক বিনীত অনুৰোধ জনালোঁ।
ইতি
আপোনাৰ একান্ত বাধ্য ছাত্ৰ-ছাত্ৰী
ক খ গ
তাৰিখঃ …………
এই Post টো Update কৰাত সহায় কৰিব বিচাৰে নেকি?
ইয়াত কিবা ভুল, অসম্পূৰ্ণ তথ্য বা নতুন তথ্য থাকিলে আপুনি এটা উন্নত version প্ৰস্তুত কৰিব পাৰে। Live Post তৎক্ষণাৎ সলনি নহ'ব।
Update This Post